Արշավային փայտեր

Արշավային փայտեր

Արշավային փայտերը օժանդակ պարագաներ են, որոնք նախատեսված են լեռնային արշավների ժամանակ ծանրաբեռնվածությունը թեթևացնելու համար: Նրանց խնդիրն է բեռի որոշ մասը վերցնել հոդերից և ոտքերի մկաններից՝ այն տեղափոխելով ձեռքեր և ուսի վերին գոտու այլ հատվածներ: Արշավային փայտերի կիրառումը օգնում է հիմնականում լեռներից իջնելու ժամանակ: Բացի այդ, փայտերը լրացուցիչ հենք են ապահովում: Մասնավորապես, երբ ուսապարկի ծանրության ազդեցության տակ ձեր ծանրության կենտրոնը տեղափոխվի, փայտերը կապահովեն ձեր կայունությունը:

Լեռնային վերելքների ժամանակ փայտերը օգտագործվել են դեռևս վաղուցվանից: Հայտնի է, որ դեռ 1900-ականներին լեռնագնաց Ալիս Մենֆիլդը արշավների ժամանակ որպես օժանդակ հարմարանք օգտագործում էր երկար փայտե ձեռնափայտ։

Կառուցվածք

Արշավային փայտերը լինում են ինչպես ֆիքսված երկարությամբ, այնպես էլ երկարացվող (65-ից 145 սմ): Վերջիններիս բարձրությունը կախված է օգտագործողի բոյից, ինչպես նաև լեռ բարձրանալու կամ իջնելու հանգամանքից։ 

Կառուցվածքի տեսանկյունից արշավային փայտերը ալյումինե խառնուրդից սնամեջ խողովակներ են: Որոշ դեպքերում ալյումինը տիտանով կամ ածխածնային մանրաթելով է խառնված: Արշավային փայտերի երկրորդ տարբերակը նկատելիորեն թեթև է, բայց նաև ավելի բարձր գին ունի: Փայտի ստորին հատվածում գտնվում է ծայրակալ, որն ապահովում է  շփում մակերևույթի հետ և քչացնում է փայտերի մաշվածությունը։ Արշավային փայտերի բռնակը շատ առումներով նման է սովորական դահուկային փայտի բռնակին, բայց այն ունի մի փոքր տարբերություն, որն արշավականին, կախված ռելիեֆից, թույլ է տալիս տարբեր կերպ բռնել փայտը: 

Արտադրվող արշավային փայտերի որոշ մոդելներ վերազինված են «հակահարված» համակարգով, որոնք հեշտացնում են փայտի շփումը կոշտ հողի հետ: Նման փայտերը կարող են օգտագործվել թույլ դաստակներով կամ արմունկներով մարդիկ՝ ձեռքերի լարվածությունը թեթևացնելու համար

Պետք չէ շփոթել արշավային փայտերը սկանդինավյան քայլքի փայտերի հետ: Վերջիններս նախատեսված են աերոբիկ մարզումների համար, որոնք նախատեսված են հարթ մակերևույթի վրա քայլքի և շատ ավելի ընդհանուր բաներ ունեն դահուկային սպորտային փայտերի հետ: