Ի՞նչպես պատրաստվել Արարատ լեռ վերելքին

Արարատը համարվում է Հայկական լեռնաշխարհի ամենագեղեցիկ զարդը` իր 5165 մետր բարձրությամբ, և իհարկե, Հայաստանի խորհրդանիշը։ Մեր թիվը նրան տվել է «երազանքի գագաթ» անունը։ Մեր ակումբի առաջին փորձը Արարատ լեռ վերելքի եղել է դեռևս 1996 թվականին։ Այս հոդվածում կպատմենք, թե ինչպես պատրաստվել Արարատ լեռ վերելքին, իսկ գույք և հանդերձանքի մասին մանրամասն հոդվածը առաջիկայում կներկայացնենք ձեզ։

Լավագույն ժամանակահատվածը Արարատ վերելքի համար

Արարատ լեռ վերելքի լավագույն ժամանակահատվածը հուլիսից մինչև սեպտեմբեր ընկած ժամանակահատվածն է։ Ինչ խոսք, մնացած ամիսներին նույնպես հնարավոր է իրականացնել վերելք, սակայն եթե խոսքը գնում է լավագույնի մասին, միանշանակ վերելք կատարեք հուլիս կամ օգոստոս ամիսներին։ 2017 թ-ին վերելքը կատարեցինք սեպտեմբերի 21-ին՝ ՀՀ անկախության օրը, և խմբի բոլոր մասնակիցներով անկախությունը տոնեցինք երազանքի գագաթում։ Նշենք, որ այդ ժամանակ արդեն եղանակը բավականին սառն էր, իսկ գագաթում օդի ջերմաստիճանը մոտ -25 աստիճան։

Արարատ վերելքը դժվա՞ր է արդյոք

Ամենահաճախակի տրվող հարցերից մեկն է։ Իրականում այդքան բարդ չէ, եթե կա ցանկություն, պատասխանատվություն և ուժեղ կամք։ Արարատը չի համարվում տեխնիկապես անհաղթահարելի կամ բարդ լեռ։ Հեշտ վերելքի համար պետք է ճիշտ մարզվել, հետևել ուղեկցորդների խորհուրդներին, սնվել ճիշտ, կարգավորել քնի ռեժիմը, չօգտագործել առողջությանը վնասակար միջոցներ, օրինակ ալկոհոլ կամ ծխախոտ։

Քանի՞ օր է տևում Արարատ վերելքը

Նախ նշենք, որ ամբողջական տուրը 7-օր է, որից 4-ը հատկացված է Արարատ վերելքին, իսկ մյուս օրերը Արևմտյան Հայաստանի տեսարժան վայրերով շրջագայությանը։ Ամբողջական ծրագիրը ԱՅՍՏԵՂ։ Ինչպես նշեցինք, Արարատ լեռ վերելքը տևում է 4-օր, մեկնարկից առաջ ձեզ մեր ուղեկցորդները կհրահանգավորեն, թե ինչ հանդերձանք պետք է կրել, կախված եղանակից, ինչ անհրաժեշտ իրեր են անհրաժեշտ վերելքի ժամանակ և այլն։ Վերելքը սկսում ենք 2200 մետրից, վերցնում ենք մեզ անհրաժեշտ ջուրը (1.5-2լ), սնունդը և տեղավորում մեր փոքրիկ ուսապարկերի մեջ (25-35լ), որում լինում է միայն առաջին անհրաժեշտության իրերը։ Ուսապարկում նաև պետք է լինի տաք բաճկոն, անձրևանոց, արևապաշտպան քսուք, իսկ մյուս իրերը կբարձրացնեն ձիերը։ Հասնելով 3200 մետրի վրա գտնվող շատ գեղեցիկ և հարմարավետ առաջին ճամբար՝ կճաշենք, կվերցնենք մեր իրերը և կտեղավորվենք վրաններում (2 անձի համար նախատեսված)։ Երեկոյան ընթրիքից հետո կքննարկենք վաղվա երթուղին և կգնանք քնելու։ Առավոտյան կնախաճաշենք և կսկսենք վերելքը Արարատի 2-րդ ճամբար, որը գտնվում է 4200 մետր բարձրության վրա։ Հասնելով այնտեղ կրկին կճաշենք և կտեղավորվենք վրաններում։ Երեկոյան ընթրիքից հետո արդեն ժամանակն է հանգստանալու՝ քնելու, քանի որ գիշերը՝ մոտ 01։00, սկսելու ենք վերելքը դեպի 5165 մետր՝ Արարատի գագաթ։ Գիշերը նշված ժամին վերկացից և թեթև սնվելուց հետո սկսում ենք վերելքը, (ինչպես նշեցինք գույքի և հանդերձանքի մասին կունենանք մանրամասն առանձին հոդված) հասնելով սառցադաշտ հագնում ենք կատվիկները և հասնում գագաթ։ Եղանակից կախված կփորձենք երկար և անմոռանալի ժամանակ անցկացնելու գագաթին։ Դե ինչ, գագաթը վայելելուց հետո իջնում ենք դեպի 2-րդ ճամբար, թեյ ենք խմում, սրճում, թեթև սնվելուց և մոտ 3 ժամ քնել հանգստանալուց հետո, հավաքվում ենք, վերցնում մեր ուսապարկը, փայտիկները, իջնում ենք 1-ին ճամբար։ Դե իհարկե, մեր ծանր իրերը այս անգամ ևս կտեղափոխեն ձիերը։ Գիշերում ենք 1-ին ճամբարում, իսկ մյուս օրը արդեն իջնում մեր սկզբնակետ՝ 2200 մետր, որտեղ մեզ կսպասեն մեքենաները և կհասցնեն Բայազետ։

Ի՞նչ ֆիզիկական պատրաստվածություն է անհրաժեշտ Արարատ վերելքի համար

Լավագույն միջոցը մեզ հետ արշավելն է, ցանկալի է մեկնարկից ոչ ուշ, քան 2 ամիս առաջ։ Բացատրենք, թե ինչու. նախևառաջ ոտք եք դնում արշավային հեքիաթային կյանք, տիրապետում եք շարքով քայլելու տեխնիկային և պատկերացնում, թէ ինչու է դա կարևոր վերելքների ժամանակ և ինչքանով է տեխնիկան Ձեզ օգնում։ Արշավների ժամանակ ծանոթանում եք խմբի ղեկավարի հետ, ուղղում նրան ձեզ հետարքրող բոլոր հարցերը, ինչպես նաև ծանոթանում այլ արշավականների հետ, որոնցից շատերը արդեն իսկ վերելք են կատարել Արարատ  լեռ և բնականաբար, նրանք նույնպես կտան ձեզ շատ հարցերի պատասխանը, կկիսվեն իրենց փորձով։ Գույքի և հանդերձանքի հետ կապված ժամանակի ընթացքում ձեռք կբերեք փորձ՝ տեսնելով և իհարկե փորձարկելով ձեր հանդերձանքը։ Որպես օրինակ բերենք արշավային փայտիկները, եթե դուք նրանք գնեք մեկնումից առաջ և չունենաք նրանով քայլելու փորձ, առնվազն առաջին 2-օրը ձեզ համար փայտիկները փորձելը մեղմ ասած կդառնա չաչարանք և լրացուցիչ ուժի վատնում։ Վերելքից առաջ հատուկ Արարատ լեռ վերելքի մասնակիցների համար կազմակերպում ենք կլիմայավարժեցման (ակլիմատիզացիոն) վերելքներ հիմնականում Արագած և Աժդահակ լեռ։

Ի՞նչպես ենք հասնելու Արարատ լեռ

Կրկին հաճախակի տրվող հարցերին է դասվում։ Խումբը վաղ առավոտյան Երևանից մեկնում է և Բավրային անցակետով հատում հայ-վրացական սահմանը, ապա վրց-թուրքական սահմանը, Կարծախի անցակետով։ Մեր առաջին կանգառը լինում է պատմական հազար ու մի եկեղեցիների քաղաք Անիյում, որից հետո մեքենայով հասնում ենք մինչ Բայազետ։ Գիշերակացը լինում է Բայազետի հարմարավետ հյուրանոցներից մեկում, իսկ մյուս օրը առավոտյան մեքենաները հասցնում են մեզ Արարատ լեռան ստորոտ, 2200 մետր և սկսվում է մեր վերելքը։

Բժշկական զննում Արարատ վերելքից առաջ

Կարևոր հանգամանքներից մեկը, իհարկե, մասնակցի առողջական վիճակն է։ Պետք չէ մատերի արանքով նայել այս հարցին, մի մոռացեք, որ գնում եք երազանքի հետևից։ Առաջնահերթ ստուգեք սիրտը և թոքերը։ Շատ կարևոր հանգամանք է կազմակերպիչներին կամ ուղեկցորդներից մեկին նախապես տեղեկացնելը Ձեր առողջական խնդրի մասին, եթե դա առկա է, մի մոռացեք, որ գտնվելու եք 5165 մետր բարձրության վրա։

Հ․Գ հոդվածում շատ մանրամասներ հասկանալի պատճառներով տեղ չեն կարող գտնել, նշենք որ ցանկացողների հետ մեր գրասենյակում ունենում ենք հանդիպում և ներկայացնում ամենը, ցուցադրում լուսանկարներ տեսանյութեր և մանրամասնորեն պատասխանում բոլոր հարցերին որից հետո նոր կնքվում է մասնակցության պայմանագիրը։

Վերելքի մանրամասներին կարող եք ծանոթանալ ԱՅՍՏԵՂ