Արշավային զանգապաններ

Սկզբում շատ կարևոր պարզաբանում սկսնակների համար, ովքեր իրանց առաջին քայլերն են անում արշավական կյանքում։ Կայքերում որոնելիս և առհասարակ հետաքրքրվելիս շատ ենք լսում հիմնականում ռուսերեն «бахилы», «гамаши», «гетры», քիչ դեպքերում նաև «фонарики» անվանումները։ Իրականում բոլոր թվարկվածները նույնն են և նույն բանի մասին է գնում խոսքը։ Պայմանավորվենք այսուհետ անվանել արշավային զանգապաններ և սկսենք ծանոթանալ նրանց հետ։

Զանգապանները նախատեսված են կոշիկները ջրից, քարերից և կեղտից պաշտպանելու համար: Բարձրորակ կաշվից կամ լավ թաղանթով պատրաստված անջրաթափանց կոշիկներն ունեն մի հիմնական  թերություն. թրջվելուց հետո, դրանք շատ ուշ են չորանում: Կոշիկից ներս թափանցող մանր քարերի հետ նույնպես ոչինչ չես կարող անել, այնպես որ չի կարելի տաբատի և կոշիկի միջև թողնել բաց տարածություն:

Ներկայացնենք զանգապանների տեսակները

Վազքի զանգապաններ

Սրանք ամենակարճն են և թեթևը, հաճախ պատրաստվում են առաձգական ձգվող նյութերից: Նախատեսված են վազքի կոշիկներով խորդուբորդ տեղանքով վազելու, փոշիներից, ցեխից պաշտպանելու համար: Խորհուրդ չի տրվում դրանք օգտագործել արշավային երթուղիներում, քանի որ նման պայմաններում դրանք արագ մաշվում և պատռվում են:

Արշավային ցածր զանգապաններ

Այս տեսակը բարձրությամբ հասնում է  ստորին սրունքի միջնահատվածին, պատրաստված է խիտ, դիմացկուն գործվածքներից: Արշավային կոշիկները պաշտպանում են մանր քարերից, կեղտից և բոլոր տեսակի անտառային ցեխից: Դրանք նաև կարող են օգտագործվել ոչ բարդ լեռնային տեղանքում և ոչ խորը ձյան վրա քայլելիս՝ ձերբազատելով կոշիկները անընդհատ թափ տալու կամ չորացնելու անհրաժեշտությունից: Այս տեսակը կարող եք կրել  ինչպես տաբատի վրայից, այնպես էլ դրանց տակից:

Արշավային բարձր զանգապաններ

Բարձրությամբ հասնում են ծնկին, պատրաստված են ծանր, շատ դիմացկուն գործվածքից (առավել հաճախ գործվածքն այնքան կոշտ է, որ ոտքին հագցրած զանգապանը ունակ է ուղղահայաց կանգնել՝ պահպանելով իր ձևը): Նախատեսված է խորը ձյան մեջ քայլելու, ինչպես նաև խորդուբորդ երթուղիների վրա հաճախակի քայլելու համար, որտեղ ավելի թեթև զանգապանի գործվածքը արագ մաշվում է:

Արշավային զանգապանի կառուցվածքը

Զանգապանների կառուցվածքը կդիտարկենք OR Rocky Mountain High Gaiters-ի մոդելի օրինակի վրա: Ծնկի տակից ամրացումը այս մոդելում կատարվում է  կոշտ ճարմանդների շնորհիվ ամրացվող շղթայով: Ամրացման այլընտրանքային տարբերակը ամուր առաձգական ռետինե սողնակով ամրացումն է: Ամրակները անհրաժեշտ է չափել և ընտրել ըստ ոտքի անհատական կառուցվածքի: Փորձեք զանգապանները քաշել ոտքից ներքև․ որքան դժվար են դրանք քաշվում, այնքան ամուր են ամրացված ոտքին:

Ծանոթացեք նաև, թէ ինչպես ընտրել արշավային զանգապաններ