Ֆուձիյամա լեռ - Ֆուջի

Ֆուձիյամա լեռ որը հայտնի է նաև Ֆուձի, Ֆուջի, Ֆուջիյամա կամ Ֆուձիսան անվանումներով։ Ֆուձիյամա լեռը, որի բարձրությունը 3776 մետր է, գործող հրաբուխ է Հոնսյու կղզում։ Այն հանդիսանում է նաև Ճապոնիայի ամենաբարձր լեռնագագաթը։ Ֆուձիյամա լեռը գտնվում է Տոկիոյից 90 կմ արևմուտք-հարավ-արևմուտք։ Բացի ամենաբարձր գագաթը լինելուց, Ֆուձիյաման համարվում է նաև սուրբ լեռ։ Այն կրոնական ուխտագնացության և տուրիզմի կենտրոն է։ Ֆուձիյամա լեռը համարվում է նաև Ճապոնիայի խորհրդանիշերից մեկը։ Ներկայում լեռան գագաթին տեղակայված են սինտոիստական տաճար, փոստի բաժանմունք և օդերևութաբանական կայան։ Լեռան շրջակայքն ընդգրկված է Ֆուձի-Հակոնե-Իձու ազգային պարկի տարածքում, որը համարվում է ՅՈՒՆԵՍԿՕ-ի համաշխարհային ժառանգության օբյեկտ։

Ֆուձիյամայի գագաթը կանոնավոր կոն է։ Խառնարանի տրամագիծը մոտ 700 մ է, իսկ  խորությունը մինչև 100 մ։ 781 թվականից հետո տեղի է ունեցել 12 ժայթքում, վերջինը՝ 1707-1708 թվականներին։ Լանջերը ծածկված են մշտադալար անտառներով։ Ֆուձիյամա լեռ բարձրանալու ամենահարմար ամիսներն են հուլիս և օգոստոս ամիսները։ Ֆուձիյամա անվան առաջացումը պարզված չէ։ Ըստ ժողովրդական ստուգաբանության՝ Ֆուձի անունը նշանակում է «իրեն հավասարը չունեցող», «անզուգական»։ Ըստ այլ պնդման՝ Ֆուձիյամա անվանումը նշանակում է «անսպառ»։